MAP husik ikan oan Tilapia total 31.000 ba kolan Ikan Iha Ermera

Elsio Jong

Ermera – Ministerio da Agricultura e Pescas (MAP) liu husi Diresaun Geral Pescas (DGP) hala’o serimonia husik ikan oan Tilapia iha suco Asu-Lau, Aldeia Sare, posto administrativu Hatulia Municipiu Ermera.

MAP estabelese kolan ikan tilapia iha municipio Ermera total 31 no total ikan oan ne’ebe maka atu husik hamutuk rihun tolu nulu- resin ida, kada kolan husik ikan oan hamutuk rihun sanulu. Kolan ne’e rehabilita husi Kompaña SEIXAS Unpessoal.LDA. Dehan Ministro MAP Estanislau Aleixo da Silva ba jornalista iha Ermera Aldeia Sare, loron Sesta (30/09/2016).

“Ami Eskolha Municipio Ermera aldeia Sare, pratikamente ba kolan ikan hotu-hotu maibe kolan balun tekniku peskas seidauk hatama be maibe tempu badak sira sei hatama be ba kolan hotu no sei lori ikan husi Gleno atu ba husik iha kolan ne’e”. tenik estanislau Aleixo da Silva

MAP sei fo asistensia teknika durante tinan ida ka tinan rua nia laran ba Komunidade iha aldeia
Sare liu-liu sira ne’ebe maka kaer programa kolan ikan ne’e sei hetan formasaun no treinamentu atu oinsa halao atividade hakiak ikan no oinsa jere hahan ikan nian tanba atividade ne’e hanesan atividade negosiu komunidade. Katak Estanislau Aleixo da Silva.

Nia subliña katak, ikan hirak ne’e tinan ida it a bele koileta dala rua, iha fulan 3 ou 4 bele koileta ona no ikan hirak ne’e sira bele faan $. 5 ba kilo ida I osan ne’ebe mak sira hetan bele sustenta ekonomia familia nian. Neduni ami fo rekemondasaun ba municipio sira seluk katak tenki servisu dididak sekarik iha disfukuldade ruma bele hato’o ba MAP liliu ba Diresaun Jeral Pescas atu nune’e bele tau matan ba sira hodi resolve problema saida mak sira infrenta ida ne’e atu bele fasilita sira nia servisu.

Iha fatin hanesan Director Geral Pescas Acacio Guterres hateten, atividade hakiak ikan ne’e Ita hare’e katak potensia ida ne’e bele aproveita hasa’e rendimento ekonomia familia nian .

Iha tinan 2015 MAP liu huis diresaun jeral peskas komesa survey iha Timor laran tomak para hare’e fatin ne’ebé mak sai potensia ba hakiak ikan. Agora dadauk ita servisu hamutuk ona ho Governu Nova Zelandia hodi produs ona ikan oan iha Gleno para bele fo apoiu ba komunidade sira ne’ebé presiza hakiak. Katak Acacio.

Iha biban ne’e Administradór Posto Administrativu Hatulia Municipio Ermera, José Manuel hateten . Ami agradese ba MAP nia esforsu tomak hodi estabelese kolan ikan iha municipiu Ermera, tanba programa ida ne’e bele fo servisu ba komunidade hodi hakiak ikan no fo benefisiu ba sira liu husi programa ne’ebé mak governu implementa dadauk.

Iha parte seluk espansaun ba ikan tilapia nafatin sei halao iha Munisipiu no Oinsa maka atividade hakiak ikan iha Municipio sira ne’e lao, MAP halo kooperasaun hamutuk ho Kompañia COICA husi nasaun Korea hodi estabelese fali sentru treinamentu iha posto Administrativo Maubara atu nune’e bele fasilita treinamentu liu-liu hasae kapasidade no konhesimentu komunidade sira nian iha area peskas, durante ativiadde ne’e lao tekniku peskas mos sei fasilita no akompana hakiak nain sira.

Referencia : http://maf.gov.tl/tt/?p=2127